Xasan oo qaabilay wafdiga Pakistan ee jooga Muqdisho
Madaxweynaha Soomaaliya, Xasan Sheekh Maxamuud ayaa galabta qasriga madaxtooyada ku qaabilay wafdi sare oo ka socday ciidamada cirka ee dowladda Pakistan, iyada oo uu hoggaaminayay taliyaha difaaca cirka, ahna taliye ku-xigeenka ciidanka cirka Pakistan, Air Marshal Muhammad Sarfraz.
Kulanka oo ahaa mid xasaasi ah ayaa waxaa sidoo kale ka qeyb-galay wasiirka gaashaandhigga, Axmed Macallin Fiqi, taliyaha ciidanka Xoogga Soomaaliyeed, Sareeye Guuto Ibraahim Maxamed Maxamuud iyo taliyaha ciidanka cirka Soomaaliya, Sareeye Guuto Cabdirisaaq Maxamuud Xaaji.
Inta uu socday kulanka ayaa waxaa looga hadlay sare u qaadista iyo dardargelinta dhismaha ciidanka cirka Soomaaliyeed, iyadoo si gaar ah diiradda loo saaray dadaallada lagu xoojinayo awoodda ciidanka cirka, horumarinta tayada iyo tababarka ciidanka iyo xoojinta iskaashiga dhinaca difaaca ee Soomaaliya iyo Pakistan.
Dadaalladan ayaa qeyb ka ah qorshayaasha lagu horumarinayo laguna dhisayo Ciidanka Cirka Soomaaliyeed, si loo dardargeliyo howlaha Taliska Guud ee ciidanka xds, loona xoojiyo awoodda difaaca cirka ee dalka.
Kulankan ayaa sidoo kale muujinaya muhiimadda ay dowladda Soomaaliya siinayso horumarinta iyo tayeynta ciidamada cirka, gaar ahaan xilli ay socdaan dadaallo lagu dhisayo ciidan Soomaaliyeed oo leh awood iyo tababar sare, kana qeyb qaata sugidda amniga iyo difaaca hawada Soomaaliya
Si kastaba, kulanka manta ayaa daba socda heshiis dhanka iskaashiga difaaca ah oo ay dhowaan wada galeen labada dowladood, kaas oo ay wada saxiixeen wasiirka gaashaandhigga Soomaaliya Mudane Axmed Macallin Fiqi, oo horay booqasho rasmi ah ku tegay magaalada Islamabad, halka Pakistan uu u saxiixay wasiirka difaaca, Mudane Khawaja Muhammad Asif. Heshiiskaas ayaa ah mid lagu xoojinayo wada shaqeynta dhinacyada difaaca iyo amniga, iyada oo sidoo kale lagu horumarinayo awoodda ciidamada.
Is-afgaradkan ayaa sidoo kale dhigaya in labada dhinac ay iska kaashadaan la-dagaallanka argagixisada, tababarrada ciidamada, is-weydaarsiga khibradaha, aqoonta milatari, kobcinta awoodaha difaaca iyo xoojinta wada-shaqeynta amniga.
Waxaa kale oo uu saxiixa is-afgaradkaas muujiyay sida ay Soomaaliya iyo Pakistan uga go’an tahay xoojinta xiriirkooda istaraatiijiyadeed iyo ballaarinta iskaashiga labada dal ee dhinacyada difaaca iyo amniga, isagoo saldhig u noqonaya wada-shaqeyn wax ku ool ah oo u adeegta danaha labada dhinac.
